講到遊輪，呢次之前我淨係n年前好細個時試過麗星郵輪的獅子星號和雙魚星號，我仲記得當時已經覺得架船好大好靚，泊係海運碼頭好好巨型，依家先知原來以遊輪黎講只係好細隻^^決定要試一下遊輪旅行，首先當然要選船公司，我即刻做下research，排除左一d好formal的遊輪，淨番的不外乎NCL、RCL、Carnival呢d，之後又發現仲有好多遊輪仍然行緊定時進餐制，即係晚餐分main和second兩個時段，揀左就每晚都要呢個時段食飯，而且通常係大枱，要和人搭枱傾計...可能好多人坐遊輪就係鐘意呢d交流，不過唔係我杯茶，所以終於揀左NCL，因為佢係行free dining制，任何時候自由入座，而且大部分都係small table，可以靜靜地吃餐飯！仲有一樣好特別的係佢沒formal night，旅行梗係唔想帶甘多野，飲衫唔駛帶，yeah！
事實證明我的決定係正確的，我地對NCL呢間公司和架船都好滿意，成功令到我地愛上左遊輪！題外話，我一直有keep住睇cruise critic呢個遊輪forum，NCL係裡面的評價唔算好，不過正如某遊輪老手講，沒有最好的船，只有最適合自己的船，可能坐慣遊輪的人鐘意有formal night、有正式的主餐廳，偏偏我地唔like，所以找到岩自己的就可以了^^
選定左船公司，就要揀航線，一睇先知花多眼亂，原來甘多port可以由海上抵達！首先排除左美國的航線，太多sea day對我地第一次玩遊輪的人會比較悶，之後都係決定揀番遊輪新手好適合的西地中海航線，呢條航線唔單止port intensive，只有一日sea day，仲要個個port都係靚景點，算係其中一個黃金航線！NCL行西地中海的係NCL Epic，當時仲係世界第三大遊輪，有成15萬噸，2010年先下水，算係新船，所以之前幾個月都好期待！！！
由於怕飛機delay影響上船，特意早一日到巴塞隆拿，第二日玩左個上午就搭的士直奔遊輪碼頭，好快係天橋度已經見到NCL Epic啦！之前係blog睇過好多次，但係親身見到真係好興奮，架船果然好大，個震撼感簡直難以形容！第一次係唔同d，之後搭多左遊輪就沒呢d震撼感啦！NCL Epic，作為NCL其中一艘旗艦遊輪，有好多新設施，特別的就係甲板上除左泳池和按摩池，仲有三條大滑水梯，有一條仲係好似長隆水上樂園個大喇叭，好好玩！第一次住好d，當然試下露台房，間房流線型設計，係比較細小，不過麻雀雖小，五臟俱全，廁所和企缸分開，好方便！免費Dinner有兩間餐廳，雖然free dining，不過好少時間要等位，食既係3 course dinner，味道普普通通，不過經歷過自由行和跟團歐洲的無啖好食，已經覺得好ok了！玩的地方，只有一日sea day，架船好大，行上行落都要時間，free time都係玩水多，食下hea下就一日！
仲有得睇免費的Blue Man Group show，呢個show係Las Vegas要過100美金，依家免費，梗係要睇！不過呢d美式幽默我唔識欣賞，幾個藍色的人係度做埋d無聊野，好悶...反而有個Legends in Concert係d人扮外國歌星，扮Adele個好似，唱chasing pavements仲好好聽！另外有一晚唱Beatles，我就唔太識了...另外俾錢睇左個馬戲show，個show普通左d，都沒長隆馬戲甘好睇，早知唔加錢！太多野做啦，都沒時間玩下d cooking or gym lesson，真係要講一句，遊輪係好忙架^^
西地中海線都係d經典的port，第一個port到左Naples，一出車站就有好多shuttle公司到龐貝古城，求其揀一間上車la！唔駛半個鐘就到，留兩個幾鐘。成個古城好大，行極都仲有！匆匆行左幾個重要景點，就夠鐘集合lu！Naples碼頭好近市區，上番遊輪食個lunch，又落船行下拿玻里新堡和市區先！仲有呢個port的碼頭沒遮沒擋，可以清楚睇晒成隻船，所以要影船一定要係呢個port！
第二個port停Civitavecchia，碼頭有free shuttle到市區，之後行一陣就到火車站！其實之前到個梵帝岡，今次主要想上圓頂！搭左差唔多一個鐘到梵帝岡，竟然撞正教宗出巡！人山人海，不過可以第一次親身見到教宗，好感動！人實在太多，只好先行左聖天使橋和萬神殿，下午先返來！人潮岩岩散左，圓頂條龍難得地少人，即刻排！搭lift之後仲要轉左好多唔同的樓梯，行到氣咳，終於到左圓頂，見到條鎖匙啦！好開心！
第三個port到我好期待的佛羅倫斯啦！今次跟遊輪tour可以一次過到Pisa和Florence，而且遊輪tour有個好處，唔駛驚遲到上唔到船！匆匆係Pisa停留一個鐘，個個都要扮下托塔post，就會到tour重點的Florence！
一到達佛羅倫斯已經好開心！我係衝上雲霄super fans，十年前睇左衝上已經好想好想好想到Florence一遊，因為當年真係拍得太靚太浪漫，估唔到竟然要衝二都拍左先黎到！Florence有4個幾鐘自由時間，集散地點係聖十字教堂，好方便！落車即刻行小路上米高安哲羅廣場，原來真係好近，15分鐘就到啦！終於踏足到Sam哥同阿Belle定情一吻的地方，好興奮好興奮！仲見到Belle做野個間餐廳，可惜沒時間坐低慢慢食...影左好多相，都要帶住依依不捨的心情落山，經過老橋，行下聖母百花大教堂、領主廣場，慢慢感受呢個充滿住衝上雲霄氣息的地方，而且佛羅倫斯呢個city真係好靚，周圍散發住藝術氣息，難怪係文藝復興的發源地，我真係好想再黎啊！
第四個port係馬賽，遊輪有俾錢的shuttle車到市區！先搭小火車上聖母院教堂，然後就行下馬賽港，老佛爺百貨，仲買左好多手工番梘！
第五個port係帕爾馬，又係搭遊輪shuttle出市區！行下帕爾馬大教堂，再係city度隨意行下，見到超市，當然睇下有沒好野！買左黑毛豬午餐肉，平過香港好多！
上船前到左聖家堂，我到過好多歐洲教堂，都不得不讚歎真係好靚，好特別！尤其內裡decoration好unique！落船係巴塞隆拿留左兩日，買左hop on hop off ticket，到左奎爾公園、魯營球場、奧林匹克運動場、米拉之家、巴特婁之家呢d大路景點，仲係蘭布拉大道食左好好味的海鮮拼盤，有大蟶子、mussels，加d香草調味，好正！之後臨上機前梗係要買黑毛豬！買左成隻脾，切到十幾包都係百幾蚊歐羅，好抵！其實未來之前一直聽人講巴塞隆拿治安好差，所以都好擔心，不過來到後真係扭轉晒d印象，巴塞隆拿係一個好靚的city，周圍都係藝術品，高第的建築好特別好得意，食物無論tapas和海鮮都好岩我地品味，成為左我其中一個好鐘意的歐洲city！
今次個trip第一次體驗左遊輪，真係好好玩，而且食好住好，又唔駛搬行李，仲慳番好多transport time，夜晚瞓覺時架船就帶我地到左第二度！遊輪唔係只係岩年紀大的人，我地都好鐘意呢種旅行模式，之後再坐多左幾次遊輪都好正，遊輪真係會上癮呢^o^
沒有留言:
發佈留言